Nënkryetarja e LSI në Tiranë, Brisida Shehaj, përmes një postimi në rrjetin social ‘Facebook’ ka reaguar pas deklaratës së sotme të Ambasadorit të BE-së në Tiranë, Luigi Soreca.
Soreca i bëri thirrje palëve për konsensus në mënyrë që të avancohet procesi i integrimit të vendit. Reagimi i diplomatit europian në Tiranë, vjen në momentin kur Holanda u shpreh qartazi hapur që reformat e ndërmarra nuk janë të pamjaftueshme për hapjen e negociatave.
Shehaj i kujton ambasadorit Soreca sloganin e qeverisë: “Kemi votat, bëjmë ç’duam”. Slogan ky i cili ka shërbyer si një mur, i përforcuar dhe prej diplomatit të BE, për të penguar konsensusin politik. Ndaj receta për konsensus nga ish-deputetja është shembja e këtij muri.
Postimi i plotë
Çfarë duan shqiptarët?
Sondazhet e Komitetit Shqiptar të Helsinkit në 2019 dëshmuan se 63% nuk i besojnë Reformës në Drejtësi.
Instituti për Demokraci dhe Ndërmjetësim në 2020 dëshmoi se mbi 85% e shqiptarëve nuk besojnë në ndëshkimin nga organet e Reformës në Drejtësi.
Këto për dijeni Z. Ambasador. Ndërkohë, sa dosje të rënda ka SPAK në duar? Sa ka vepruar?
Këtë a mund t’ua thoni shqiptarëve? Dhe nëse “receta”, që sugjeroni është konsensusi politik, a e dini ju Z. Ambasador se sa herë ka dhënë konsensus, opozita ka patur e ka përballë një mur me slloganin: “Kemi votat, bëjmë ç’duam”?
Muri u forcua edhe nga qëndrimet tuaja Z. Ambasador, ndaj nëse konsensusi është zgjidhja, rrëzoni murin se opozita vullnetin e fjalën ka!
Sa për ata, që bëjnë moral se nuk na dhimbset Shqipëria, duke iu “gëzuar” mosçeljes së negociatave, ka një recetë, heshtja. Sepse sa herë hapin gojën vërtetojnë kujt i shërbejnë. Boll helmuat!
