Perlat Kapisyzi, drejtori i spitalit “Shefqet Ndroqi”, atje ku 3 pacientë janë vetëvrarë në 3 muajt e fundit, ka reaguar lidhur me ngjarjen e ndodhur mëngjesin e sotëm, ku një pacient 52-vjeçar u hodh nga kati i 4-t i ndërtesës.
Kapisyzi tha se pacienti ishte shtruar në spital më 25 tetor dhe po kurohej për Covid-19. Ai tha se pacienti nuk ka shfaqur shenja psikologjike jonormale.
“Të respektojmë dhimbjen e familjarëve dhe dhimbjen tonë. Pacienti ishte shtruar më 25 tetor dhe nuk ka praqitur shenja psikologjike jonormale, nuk ka pasur ndryshime në sjelljen e tij”, tha Kapisyzi.
Drejtori i spitalit “Shefqet Ndroqi” ka kërkuar mbështetjen e gjithkujt për të vijuar luftën ndaj Covid-19.
“Në radhë të parë ngjarja na ka tronditur ne si staf mjekësor, 52-vjeçari është shtruar në datën 25 Tetor, i është nënshtruar të gjithë ekzaminimit pasi vuante dhe më herët nga sëmundje pulmonare, ka rezultuar i prekur nga Covidi, i shprehim ngushëllimet më të ndjera dhe më të sinqerta familjarëve të pacientit.
Sipas të dhënave që ne kemi, nga momenti i shtrimit, pacienti nuk paraqiste shenja psikologjike jo normale, ky është një moment shumë i vështirë për ne, kërkojmë dhe mbështetjen tuaj, për t’u kujdesur sa më mirë pacientët. Është momenti që të respektojmë dhimbjen e familjarëve dhe dhimbjen tonë, nuk mund të shprehem më shumë”, tha ai.
I pyetur nga ana e gazetarëve nëse do të merren masa shtesë për pacientët në Covid 2, pas tre rasteve të vetëvrasjes, Kapisyzi refuzoi që të përgjigjej, duke thënë se kërkonte që të respektonte dhimbjen e familjarëve, dhe të mos shprehej asnjë fjalë më tepër.
