Një 52-vjeçar u hodh nga kati i 4-t i spitalit “Shefqet Ndroqi”, i cili prej kohësh është kthyer në një spital Covid2 ku trajtohen pacientët e prekur nga koronavirusi. Viktima është hedhur rreth orës 03:10 të mëngjesit të sotëm. Ai është identifikuar si Preng Gjonaj, ndërsa ishte prekur nga koronavirusi.
Ngjarja bëhet edhe më e rëndë po të kihet parsysh fakti se në 3 muaj janë 3 pacientë që kanë kryer vetëvrasjen në këtë spital, në të njëjtën formë. Në gusht ishte një 29 vjeçar nga Durrësi, i cili u hodh nga kati i 3-të i spitalit. Pak javë më vonë ishte një tjetër pacient, që po në të njëjtën formë i dha fund jetës.
Vetëvrasja e sotme është e treta, ndërsa nuk ka të dhëna zyrtare lidhur me shkaqet që kanë çuar pacientët në një vendim ekstrem. Mësohet se viktima ndodhej në spital prej të paktën 1 jave dhe gjendja e tij shëndetësore për shkak të Covid-19 paraqitej e rëndë.
Nga raportimet mësohet se viktima nuk ka shfaqur shenja të sëmundjes së shëndetit mendor.
Prokuroria e Tiranës ka nisur hetimet pas vetëvrasjes së dytë që ndodhi në muajin shtator, por nuk ka një rezultat lidhur me të se çfarë i ka shtyrë këta pacientë.
Pas dy vetëvrasjeve të para, mjeku Pëllum Pipero i spitalit Infektiv, tha se nga ana mjekësore ndodh.
“Unë sot po bisedoja me një të sëmurë aty dhe duke qenë mirë e bukur më tha “doktor sikur po ndjej një dhimbje gjoksi” .
Kjo dhimbja e gjoksit ne na tremb jashtëzakonisht shumë sepse dikush mund të bëjë një infarkt të menjëhershëm miokardi, po kështu ndodh edhe dëmtimi i trurit nga hiposkia, mungesa e oksigjenit. Unë kam insistuar personalisht tek disa pacientë të cilët kanë bërë disa çrregullime të rënda të shëndetit mendor, që kanë pasur psikoza që kanë bërë neuroza, që kanë bërë sjellje të një depresioni të thellë. Për shembull, një pacient shkruajti një letër amaneti dhe dëshironte të vetëvritej.
Ndodhia është aq e shpejtë dhe shpesh pa shenja paralajmëruese sepse është mjaft e vështirë për ta dyshuar më herët dhe parandaluar. Ne mjekët përpiqemi t’u zëvendësojmë atë që atyre u duhet shumë më tepër sesa çdo gjë tjetër, në këtë situatë që janë familjarët, është shprehur Pipero.
