Vendimi i qeverisë 3 ditë para nisjes së viit të ri akademik për të mos hapur Universitete, ka sjellë dhe reagimin e parë të studentëve, të cilët ditën e hënën do të protestojnë para Minsitrisë së Arsimit de kryeministrisë.
Lëvizja për Universitetin do të zhvillojë ditën e nesërme në orën 11:00 një protestë simbolike para kryeminsitrisë ku do të kërkojë përgjysmimin e tarifës studentore, si dhe një paketë sociale për qiratë, internetin, librat dhe kostot e jetesës.
Lëvizja për Universitetin e konsideron si të parregullt vendimin e qeverisë, të cilët vendosin të mos hapin Universitetin vetëm 3 ditë para nisjes së vitit akademik.
Studentët paralajmërojnë se në rast mos plotësimi të kushteve, do të përshkallëzojnë protestat.
Njoftimi i Lëvizjes për Universitetin:
Që prej karantinës së muajit mars studentët kanë qenë një nga shtresat më të dëmtuara të shoqërisë. Po qeveria nuk ka menduar asnjë çast për ta. Mijëra studentë e patën të pamundur ta ndiqnin normalisht procesin mësimor online si pasojë e mungesës së mjeteve teknike dhe aksesit në internet. Mijëra të tjerë mbetën të papunë. Shumë mbetën të pastrehë në pamundësi për të punuar dhe paguar qiratë.
Nëntë muaj më vonë, e njëjta situatë rrezikon të përsëritet. Mësimi online vazhdon të jetë i pamundur për shumicën e studentëve, qiratë janë rritur, kostot e jetesës po ashtu, karta studentore nuk funksionon, abone nuk ka, shërbime sociale e shkollore jo e jo. Ndërkohë qeveria në vend që të lehtësojë barrën e studentëve, i mban të larta tarifat e studimit dhe jep urdhër që konviktet të boshatisen nga studentët.
Prandaj ne kemi ardhur këtu, përpara kryeministrisë, për të kërkuar:
- Përgjysmim të tarifës vjetore të studimit, dhe
- Një paketë sociale për qiratë, internetin, librat dhe kostot e jetesës.
Në të kundërt, në kushtet e keqshkollimit dhe papunësisë, mungesës së strehimit dhe parave, do të vijmë me mijëra studentë të tjerë, bashkë me valixhe, rroba, këpucë, libra dhe tenxhere në kryeministri.
Nëse kryeministria vazhdon të mbetet shtëpi e oligarkëve në kohë krize, ne do ta kthejmë në vatër të studentëve, punëtorëve, pensionistëve dhe qytetarëve të prekur nga pandemia.
Kupa është mbushur dhe nuk mban më.
#PërUniversitetin
#PërShoqërinë
