Partizani e ka pritur me optimizëm startin e sezonit të ri futbollistik, teksa të kuqtë kanë zhvilluar një fazë të gjatë përgatitore gjatë bojkotit.
Trajneri i skuadrës, Ilir Daja, e quan pozitive fundin e bojkotit dhe shpreson që palët ta konkretizojnë marrëveshjen në të mirë të futbollit dhe formalizimit të sportit.
Duke folur për “Panoramasport”, Daja deklaron se nuk ka justifikim për gatishmërinë, pasi sezoni nis pas afro dy muajsh nga data fillestare. Sipas trajnerit të “demave”, kontingjenti që ka në dispozicion është i gjithi gati.
Si e pritët lajmin për fillimin e sezonit të ri?
Pa dyshim që është pozitive që pas bojkotit do të fillojë sezoni futbollistik. Por që kjo gjë të mos mbetet e segmentuar, po e vazhdueshme mendoj se palët duhet të gjejnë gjuhën e përbashkët, në mënyrë që të ketë një perspektivë më të mirë financiare. Pra, të kemi një ecuri më të mirë në futboll, që të mos kemi më pas skuadra të cilat nuk mund të përfundojnë garën ashtu siç e nisën. Pra, të kemi një formalizim të futbollit shqiptar.
A është gati Partizani për startin e sezonit?
Gjersa data e fillimit të kampionatit ka qenë më 12 shtator, tani pas gati dy muajsh pas nisjes zyrtare të sezonit nuk mund të qëndrojë shprehja: ‘Se nuk jemi gati’. Ne jemi gati me gjithë maksimumin e mundësive që kemi nga problemet që dihen.
Kalendari i ngjeshur i ndeshjeve
Ngarkesa është e barabartë për të gjitha klubet njëlloj. Sa i përket grupit të cunguar që kemi, shpresojmë të kemi sa më pak dëmtime dhe lojtarë të ngarkuar me kartonë, në mënyrë që kontingjentin ta kemi efikas, edhe pse do të kemi ngjeshje të kalendarit.
