Drejtori i Urgjencë Kombëtare Skënder Brataj, ka reaguar ashpër ndaj koncesionarit të parkimit në QSUT, teksa për një rrotullim me makinë brenda ambienteve të parkimit iu desh të paguante 100 lekë. Për këtë fakt Brataj u indinjua dhe deklaroi se ai u ndje i vjedhur ditën e sotme.
Në lidhje me këtë ndodhi ka reaguar dhe ish-deputeti demokrat, Gent Strazimiri, i cili u shpreh me ironi se ‘ky’ është ndjerë i vjedhur vetëm sot, ndërkohë që ka 7 vite që parkon tek i njëjti koncensionar.
Strazimiri shprehet se sipas Brataj vjedhja ka nisur vetëm sot, ditën kur i kërkuan arbitrarisht atë që shqiptarët kanë 8 vjet që e vuajnë.
Postimi i plotë: Ky është ndjerë vetëm “SOT” i vjedhur, megjithëse vjedhja e të njëjtit konçesionar, të së njëjtës qeveri, ka hyrë në vitin e 8 të saj, tek i njëjti sportel!
Sipas këtij, vjedhja ka nisur “SOT”, ditën kur këtij i kërkuan arbitrarisht atë që ka 8 vjet që vuajnë shqiptarët.
E njëjta gjë ndodh me secilin prej këtyre që, prej 79 vjetësh ushqejnë dhe mbajnë në këmbë të njëjtën forcë regresi, anti-humane, anti-liri!
Asnjë datë nuk u përputhet me atë të shqiptarëve: as fillimi i rezistencës në Luftën e Dytë Botërore, as mbarimi i Luftës së Dytë Botërore, as fillimi i Luftës Civile brenda saj, as dita e parë e diktaturës, as dita e parë e lirisë…
Po t’i pyesësh, diktatura e Enver Hoxhës nuk nisi ditën kur u ka nisur të gjithë shqiptarëve, me 29 nëntor 1944! JO!
Diktatura e Enver Hoxhës këtyre u nis ditën kur gjyshi a babi përfundoi nën hekurat që i vendosën “shokët e luftës”… dmth kolegët e vet kriminelë…
Për dikë prej tyre, kjo ka ndodhur në 1948, për dikë tjetër në 1951, për dikë në 1956, 1961, 1974, 1978, 1982… por kurrë në 29 nëntor 1944!
Po t’i pyesësh, nga 29 nëntori i 1944 deri ditën në fjalë, Shqipëria “përparonte”, “arsimohej”, “elektrifikohej” …
Ata që gjyshi a babi së bashku me shokët, i vrau pa gjyq, i poshtëroi e shpronësoi, i internoi e ua la fëmijët e pleqtë të vdesin urie, nuk llogariten…
Ata “e meritonin” !!!
Ende sot, me të njëjtën logjikë perverse, i gjen të mbledhur tek e njëjta godinë, e së njëjtës bandë 79 vjeçare që i hëngri kokën gjyshit a babit kriminel, madje krah për krah bash me ata, “shokët e luftës”, kolegët që një ditë të bukur trokitën në derën e shtëpisë së shpronësuar që kishte zaptuar gjyshi a babi në 1944, dhe sollën… diktaturën…
Ka 79 vjet që këta ende vazhdojnë të tallen e mbajnë peng një shoqëri, që LIRINË kurrë s’e mori seriozisht… njësoj si TË VËRTETËN…
