A jemi ne shqiptarët si popull, pesimistë? Një sondazh global i para pak ditëve i OKB-së na nxori më pesimistë se mesatarja botërore, kur vjen puna te pritshmëritë për të ardhmen. Pyetjes: “Në tërësi, a mendoni se njerëzit në 2045 do të jenë më mirë, më keq, ose njësoj në krahasim me atë që janë sot?”, 46% e shqiptarëve i janë përgjigjur më keq.
Kjo përqindje është më e lartë sesa mesatarja globale, ku 32% e të anketuarve në rang global i janë përgjigjur që mendojnë të jenë më keq. 37% e shqiptarëve janë përgjigjur që mendojnë se njerëzit do të jenë më mirë, përkundrejt gati 49% e mesatares globale. 17% e shqiptarëve mendojnë se do të jetë njësoj, e përafërt me mesataren globale prej 19%.
E ftuar në “Wake Up” në Top Channel, sociologia Entela Binjaku tha se tre janë dimensionet që i shqetësojnë të rinjtë shqiptarë.
“25-vjeçarët e sotëm e shohin veten në të 40 e tyre më keq se sot, është mjaft shqetësuese. Në kontaktet që kemi i shohim të rinjtë që janë skeptikë, pesimistë.
Tre janë dimensionet ku ata shfaqen më shumë pesimistë si: mundësitë për punësim, kujdesi shëndetësor dhe çështjet mjedisore. Të rinjtë shqiptarë nuk ndihen dhe aq optimistë për të ardhmen që i pret në këto 3 dimensione.
Ne si popull mesdhetar, Ballkanik, si ka mundësi që një popullsi kaq e re si e jona të jetë kaq pesimiste. Faktorët që kanë ndikuar lidhen me modelet që përcjellim. Jetën po e kalojnë nën të njëjtët politikanë që nuk ofrojnë asgjë të re.
Motivimi për të ecur para, mungesa e meritokracisë që i bën të jenë skeptikë, dyshues për hapësira në të ardhmen. Nëse ne nuk u përcjellim modele të mira, kjo ndikon në mënyrën si e perceptojnë të ardhmen.”, sqaroi ajo.
