Nesër, ora 21:00 luhet supersfida Juventus-Barcelona e vlefshme për Ligën e Kampioneve.
Në këtë ndeshje bardhezinjtë vijnë me disa mungesa, veçanërisht në repartin e mbrojtjes. De Ligt, Chiellini e Alex Sandro, do të mungojnë për Juventusin, ndërkohë probleme ka shfaqur edhe Leonardo Bonucci pasi sot ai ka bërë stërvitje të diferencuar.
Në konferencën për shtyp, tekniku italian foli në lidhje me këto mungesa, ndërsa u ndal edhe te Lionel Messi.
Mungesat: “Chiellini nuk do të jetë për këtë ndeshje, kurse Bonuccin do të përpiqemi ta rikuperojmë. Sa i takon De Ligt, ende nuk kemi marrë ‘OK’-in nga stafi mjekësor. Do të luaj me katër mbrojtës nesër, pasi aq kam në dispozicion. Nesër do të shohim lojtarët që kemi në dispozicion, Barcelona është e fortë dhe ka kampionë të mëdhenj. Na duhet të bëjmë një ndeshje të madhe. Lojtarët me siguri do të sakrifikojnë për ta bërë diçka të tillë. Nuk është një ndeshje vendimtare, por presim me padurim të jemi në gjendje të tregojmë vlerat tona.
Përballja ndaj Messit: Është akoma në top-formë. Jam përballur me të shumë herë si lojtar dhe këtë herë do të përballem si trajner. Këta lloj lojtarësh duhen trajtuar ndryshe, duke shpresuar se nuk do të jenë në një ditë të mirë”, u shpreh Pirlo.
