Ndryshimet në Kodin Zgjedhor/ “Venecia”: Do ti shqyrtojmë në Dhjetor

Kërkesa e Presidentit Ilir Meta për një opinion lidhur me ndryshimet e njëanshme në Kodin Zgjedhor të miratuara në Kuvend nga mazhoranca dhe disa deputetë të opozitës parlamentare, do të shqyrtohen nga Komisioni i Venecias në Dhjetor.

Kjo bëhet me dije në një letër të publikuar nga Presidenca me dërgues Gianni Buquicchio-n nga Komisioni i Venecias dhe marrës, kreun e shtetit Ilir Meta.

Kujtojmë se ndryshimet e votuara nga mazhoranca dhe një pjesë e opozitës parlamentare u kundërshtuan nga opozita dhe u quajtën shkelje e marrëveshjes së 5 Qershorit. Presidenti Ilir Meta i ktheu për rishqyrtim në Kuvend, ndërsa kërkoi opinionin e Komisionit të Venecias. Ndërkohë, kryeministri Edi Rama, deklaroi se do ta rrezojnë dekretin e Metës, edhe pse përfaqësues të BE-së kanë apeluar që para votimit në Kuvend të pritet opinioni i “Venecias”.

LETRA

LEXO EDHE  ‘Kushurira ime vdiq nga Covid por nuk u raportua’/ Paloka: PD ka fakte që numri i vdekjeve është mbajtur i fshehur

Në letrën e Buquicchio-s, shkruhet:

I nderuar Z. President, Në përgjigje të letrës tuaj të datës 21 tetor 2020 me të cilën ju kërkoni një mendim urgjent “për procesin e ndryshimit të njëanshëm dhe të përshpejtuar të Kushtetutës dhe kodit zgjedhor të Republikës së Shqipërisë”, Kam nderin t’ju informoj se Byroja e Komisionit ka vendosur, e ndikuar nga koha e shkurtër e mbetur para seancës së ardhshme plenare dhe të kompleksitetit të çështjes, për të mos autorizuar procedurën urgjente.

Prandaj, mendimi do të përgatitet në procedurën e zakonshme dhe do t’i paraqitet seancës plenare për shqyrtim dhe miratim në dhjetor. Sipas praktikës sonë, ky opinion në parim do të hartohet së bashku me ODIHR.

Shfrytëzoj këtë rast për t’ju falënderuar edhe një herë për besimin tuaj në Komisionin e Venecias.