Raportuesi për Shqipërinë në Parlamentin Europian, David Lega, i ka kërkuar Kryeministrit Edi Rama që të presë këshillat nga Venecia lidhur me ndryshimet në Kodin Zgjedhor, të cilat u rikthyen për shqyrtim në Kuvend nga Presidenti Ilir Meta.
“Pajtohem me Komisionerin Oliver Varhelyi.
Parlamenti dhe Kryeministri Rama duhet të presin mendimin e Komisionit të Venecias, kjo do të ishte qasja demokratike. Zgjedhje të Lira dhe të drejta në Prill 2021!”, shkruan Lega.
Reagimi i europarlamentarit ka ardhur në një kohë kur Presidenti Ilir Meta i është drejtuar Komisionit të Venecias lidhur me ndryshimet në Kodin Zgjedhor, ndërsa mazhoranca e drejtuar nga Edi Rama pritet të votojë dekretin e Kreut të Shtetit ditën e enjte.
Rama në një reagim të tij tha se mirëpret opinionin e Venecias, por koha nuk pret.
