Manchester United dhe Chelsea ndanë pikët pas një barazimi pa gola në “Old Trafford” në kuadër të javës së gjashtë të Premier League-s.
Në fakt, për nga mënyra se si u zhvillua ndeshje ky ishte rezultati më i drejtë, edhe pse duhet pranuar që “Djajtë e Kuq” ishin më pranë fitores.
Diferencën te “Blutë e Londrës” e bëri portieri Edouard Mendy, i blerë këtë verë te Rennes, i cili në të paktën dy momente kreu ndërhyrje vendimtare, duke i mohuar golin Marcus Rashford në minutën e 36-të dhe në kohën shtesë.
Në fundin e pjesës së parë Rashford pretendoi për 11-metërsh, por edhe pasi kryesori u konsultua me sistemin VAR, i qëndroi vendimit të tij fillestar, pra për të vijuar lojën.
Debutoi në radhët e “Djajve të Kuq” Edinson Cavani, i cili u hodh në fushë në vend të James në minutën e 58-të.
