Leo Messi ka folur në konferencën për shtyp në prag të “El Classico” që do të luhet nesër në orën 16:00.
Duke folur për mikrofonat e “DAZN”, ai ka prekur rivalitetin e përjetshëm mes Barcelonës dhe Realit të Madridit, që pjesë të historisë ka edhe atë mes tij dhe Cristiano Ronaldos.
“Ai me Kristiano Ronaldon ishte një duel special, i cili do të mbetet përgjithmonë. Dueli zgjati për shumë vite dhe nuk është e thjeshtë që të ruash nivele të caktuara për një kohë kaq të gjatë. Edhe skuadrat tona ishin shumë ambicioze: Reali i Madridit dhe Barcelona, dy klubet më të forta në botë.
Të konkurrosh për kaq shumë vite është diçka që do të mbetet përgjithnjë. Dueli mes meje dhe Cristiano Ronaldos ishte shumë i bukur në nivel personal dhe besoj se njerëzit janë argëtuar: tifozët e Realit dhe Barcelonës, por në përgjithësi edhe të gjithë të apasionuarit e futbollit”.
Ndërkohë Leo Messi ka folur edhe për ndeshjen e ditës së mërkurë kundër Juventusit dhe për mundësinë për tu përballur me Ronaldon pavarësisht se aktualisht kjo gjë duket mjaft e vështirë pasi portugezi rezultoi për herë të dytë me Covid.
“Të mërkurën do të kemi ndeshjen me Juventusin dhe mundësinë për t’u përballur edhe një herë tjetër. Shpresojmë që Kristiano të mund të jetë dhe të shërohet shpejtë nga coronavirusi”. – ka thënë argjentinasi.
