Marcello Lippi e mbyll karrierën si trajner: Mund të jem i dobishëm në role të tjera!

Marcello Lippi  i ka dhënë fund karrierës së tij si trajner futbolli. “Përfundimisht e kam mbyllur punën time si trajner. Me kaq mjafton. Ndoshta mund të isha i dobishëm në role të tjera, le të shohim. Por deri në pranverë nuk do të ketë asnjë ndryshim”.

Kështu është shprehur trajneri i mirënjohur, i cili kulmin e tij e pati në vitin 2006, teksa shpalli Italinë kampione të botës.

Duke folur për “Radio Sportiva” , 72-vjeçari më pas foli për Interin dhe Juven, ish-skuadrat e tij.

“Interi? Duke pasur parasysh mungesat, barazimi mund të jetë i pranueshëm. Conte duhej të shpikte repartin e mbrojtës. Raundi i parë i ndeshjeve duket i mirë për ekipet italiane, të gjitha luajtën mirë. Në ndeshje ka momente vështirësie, veçanërisht në Champions League. Në Europa League shoh që shumë trajnerë bëjnë rotacion, ndërsa në Champions është e rëndësishme të kemi të gjithë skuadrën në dispozicion.

Juventusi? Dinamo e Kievit është e pari në kampionatin e Ukrainës, por ndaj Juves ata luajtën me frikë, kurrë nuk iu afruan golit. Juve luajti një futboll të mirë, pavarësisht mungesës së lojtarëve më të mirë. Dybala? Nëse ai është fizikisht mirë, është thelbësor. Për Ligën e Kampionëve duhen 3 ose 4 lojtarë të nivelit të lartë”.

Skuadra që Lippi ka drejtuar për herë të fundit, ka qenë Kombëtarja e Kinës, aventurë që e mbylli më 14 nëntor 2019.

LEXO EDHE  Pele sërish në spital