Kryeministri Edi Rama ka folur sot gjatë një konference për mediat lidhur me projektet infrastrukturore, që kanë nisur apo do të nisin në vendin tonë, përfshirë porte edhe aeroporte, që sipas tij, do të nxisin turizmin.
Rama zbuloi se ditën e nis dhe e mbyll me një telefonatë me ministren Belinda Balluku, për ta pyetur lidhur me garën për ndërtimin e aeroportit të Vlorës.
Rama tha se vendi më në fund do të ketë katër aeroporte, pas Tiranës, Kukësit, Vlorës dhe Sarandës. Kryeministri tha se kur flet për porte apo aeroporte, këto nuk janë premtime, por projekte.
Ai tha se për pak javë do të hapet porti i ri i Vlorës, për portin e ri turistik të Durrësit, jemi në një proces të avancuar me një shtet mik, pra është një projekt shtet me shtet. Sipas tij, porti i Sarandës nuk është premtim, por një projekt që nis pas pak ditësh.
“Dita ime nis me telefonatën me ministren që në mëngjes, dhe mbyllet me telefonatën me të, për të çarë pengesat që ka shkaktuar pandemia për ndërtimin e aeroportit të Vlorës. Gara është ndërprerë për momentin si pasojë e pandemisë, dhe ne duam që të garantojmë pjesëmarrjen e kompanive që merren me aeroporte, që në fakt janë pjesa edhe më e goditur nga pandemia.
Sa të mbyllet gara për aeroportin e Vlorës, ne jemi gati të hapim garën për aeroportin e Sarandës, që do të jetë më i vogël, dhe natyrisht me impakt strategjik për turizmin. Po ashtu do të kemi një transformim të portit të Durrësit dhe të Vlorës, përfshihet dhe një port turistik në zgjatimin e Lungomares, për të krijuar një kanal të ri kontakti me Vlorën”, u shpreh Rama.
Ndërkohë që nuk harroi që të bënte batutën e tij të përsëritur për aeroportin e Kukësit, ku tha se do të sjellë 120 të rinj nga Londra që janë vota të sigurta për PD-në.
“Kush do shajë më shumë do hypë në avion, dhe do i sjell në Kukës që të votojnë për Partinë Demokratike, shpresoj që ta realizoj këtë, pse nuk shkoni një ditë që të shihni punën që është bërë në Kukës, ku është një kantier i gjallë ndërtimi”, tha më tej Rama.
