Policia ka proceduar penalisht 18 shtetas, 3 prej tyre organizatorë të tubimit të sotëm para ministrisë së Jashtme.
Ata do procedohen për veprat penale “Organizimi dhe pjesëmarrja në grumbullime e manifestime të paligjshme” dhe “Mosbindja ndaj urdhrit të punonjësit të policisë”.
“Gjatë zhvillimit të tubimit, Policia para se të ndërhynte për të shpërndarë tubimin, u ka bërë thirrje protestuesve që të shpërndaheshin, pasi po zhvillohej në kundërshtim me masat anticovid”, informoi policia.
“Në përfundim të veprimeve u proceduan penalisht 3 organizatorët e tubimit Shpëtim Idrizi, Mesila Doda, Bojken Abazi”, njoftoi policia.
“Gjithashtu, në zbatim të Aktit Normativ, shërbimet e Policisë i kanë vendosur masat administrative përkatëse (gjobë), shtetasve që nuk kishin vendosur maskat mbrojtëse”, shtuan të njëjtat burime.
Protesta u zhvillua kundër vizitës së kryediplomatit grek në Tiranë.
