Trajneri i mirënjohur shqiptar, aktualisht në pankinën e Partizanit, Ilir Daja festoi sot përvjetorin e 54-t të lindjes, teksa nga seanca stërvitore me “të kuqtë” gjeti kohën të realizojë edhe një lidhje direkte me emisionin “Sport Time” në Supersport.
Në përvjetorin e lindjes keni qenë thuajse gjithmonë në punë. Te cili klub e keni festuar më mirë ditëlindjen?
Ditëlindjet janë të veçantë, por më të veçanta janë fitimet e trofeve. Më mirë nga të gjitha herët e tjera, e kam festuar te Skënderbeu, kur ishim në grupet e Ligës së Europës. Ka qenë fiks pas ndeshjes me Partizanin e Beogradit, pas asaj loje të shkëlqyer që bëmë në “Elbasan Arena”.
Si është gjendja e skuadrës dhe a do të shohim një Partizan për titull këtë sezon?
Tek të gjitha ekipet që kam drejtuar, ndonëse kishim objektiva të tjerë, lojtarëve u kam thënë të sillemi si kampionë. Kam një skuadër me lojtarë që kanë dalë kampionë, ndaj pse të mos e tentojmë maksimumin?!
Keni keqardhje për bllokimin e merkatos?
Ndjej keqardhje për merkaton, por është një kapitull i mbyllur. Ishte piketuar një ekip me afrime që do të përforconte grupin. Afrimet do të rrisnin kualitetin dhe rivalitetin në skuadër, pasi kampionati është i gjatë dhe do të jenë prezente dëmtimet dhe kartonët. Megjithatë që në fillim e dinim që mund të shkonte edhe kështu, ndaj tani jemi gati të gjithë që të sakrifikojmë për të marrë më të mirën nga ky grup dhe për të çuar sa më lart Partizanin.
