Kryetari i Partisë Demokratike, Lulzim Basha paralajmëroi padi penale ndaj kryebashkiakut të Tiranës, Erion Veliaj.
Në një konferencë për mediat, Basha u pyet nga gazetarët lidhur me deklaratën e Velijt. Ky i fundit tha se Basha flet për inceneratorët pasi kunatit të tij i janë prishur pazaret. Veliaj akuzoi po ashtu Bashën se ka përfituar një makinë luksoze dhe një vilë nga ata që Basha i quan oligarkë.
Në përgjigjen e tij, Basha e quajti Veliajn një “vemie” dhe shtoi se ai gënjen. Madje, paralajmëroi një tjetër padi penale të Hënën. Ditët e fundit, PD ka kallëzuar penalisht Veliajn në prokurorinë e Tiranës për shpifje, lidhur me deklarata e këtij të fundit ndaj kreut të PD-së.
“Janë gënjeshtra të vemies për të hequr vëmendjen. Është dorëzuar padi penale në prokurori, si për vilat si për makinat. Të hënën dorëzohet për shpifjen në raport me inceneratorët”, tha Basha.
Këtë të Shtunë, kryedemokrati akuzoi dhe njëherë se kontratat koncesionare të inceneratorëve janë një aferë e madhe korruptive përmes së cilës po grabiten paratë e shqiptarëve.
Ai akuzoi kryeministrin Edi Rama për keqmenaxhimin e situatës së pandemisë në vend dhe ripërsëriti kërkesën që qeveria të zbatojnë planin me 5 pika të propozuar nga PD.
