Kuvendi ka anuluar vendimin “Për shpalljen e vendeve vakante nga kandidatët nga trupa e pedagogëve të fakulteteve të drejtësisë dhe të shkollës së magjistraturës për anëtarët e Këshillit të Lartë Gjyqësor dhe Këshillit të Lartë të Prokurorisë”.
Kuvendi kishte shpallur nga dy vende të lira në secilin nga institucionet. Por, llogaritja kohore e Kuvendit për përfundimin e mandatit të anëtarëve aktualë nuk ishte e njëjtë me atë të KLP dhe KLGJ.
Kuvendi konsideronte fundin e mandatit 3-vjeçar të katër anëtarëve aktualë shkurtin e vitit 2021.
Ndërsa KLP e KLGJ vendosën llogaritjen e mandatit të anëtarëve duke vlerësuar se, mbaronin më vonë se data që deklaronte Kuvendi.
Konkretisht, Këshilli i Lartë i Prokurorisë, me një vendim të datës 13 Tetor 2020, konstatoi se mandatet e kryetarit Gent Ibrahimi dhe anëtarit tjetër nga radhët e pedagogëve, Sandër Beci, u mbaron mandati në 19 Dhjetor 2021, saktësisht 3 vjet pas emërimit të tyre në detyrë.
Po ashtu, edhe Këshilli i Lartë Gjyqësor, në një vendim të datës 15 Tetor 2020, konstatoi se mandati i anëtarëve që vijnë nga radhët e pedagogëve përfundon në 12 Dhjetor 2021, tre vjet pas nisjes zyrtarisht të punës së këtij institucioni.
