Qeveria e Izraelit ka rënë dakord të lehtësojë masat pas izolimit të dytë që u vendos prej një muaji. Nga e diela, njerëzit do të lejohen të shkojnë më shumë se 1 km nga shtëpitë e tyre për qëllime jo thelbësore; çerdhet do të rihapen po kështu plazhet dhe parqet kombëtare. Kryeministri deklaroi se bllokimi kishte qenë një “sukses i madh”.
Izraeli ka raportuar 300,000 infeksione dhe 2128 vdekje që nga fillimi i pandemisë.
Qeveria u vlerësua në pranverë për marrjen e shpejtë të masave. Bllokimi i dytë filloi në 18 shtator, pasi Izraeli regjistroi numra të lartë të infektuarish. Numri i viktimave ishte ndër më të lartët në botë në raport me popullsinë.
Numri ditor i rasteve të reja të konfirmuara ka rënë gradualisht nga një shifër e lartë prej gati 9,000 në fund të muajit të kaluar, në 1,608 të enjten, nën pragun e 2,000. Një numër i vendosur nga ministria e shëndetësisë si kusht për fazën e parë të planit të daljes nga bllokimi.
Pavarësisht statistikave, Ministri i Shëndetësisë Yuli Edelstein paralajmëroi se kishte “ende një rrugë të gjatë përpara” për të vënë virusin nën kontroll.
Ai vuri në dukje se numri i infeksioneve të reja mund të fillojë të rritet ndërsa lehtësohen kufizimet dhe se qeveria mund të detyrohet t’i rivendosë ato nëse do të kishte një rritje.
Kryeministri Benjamin Netanyahu i tha kabinetit të tij se dalja nga bllokimi duhej të ishte “gradual, i përgjegjshëm, i kujdesshëm dhe i kontrolluar” për të shmangur detyrimin për një tjetër izolim nga dy deri në tre javë.
