Mesfushori francez, Eduardo Camavinga, është një nga talentet më të mëdha të futbollit francez. Vetëm në moshën 17-vjeçare ai ka ngjallur interesin e disa klubeve më të mëdha në Europë ndërsa së fundmi edhe atë të Real Madrid.
Mesfushori me origjinë nga Angola ka debutuar me Rennes që në vitin 2018 dhe sezonin e kaluar u shndërrua në një titullar të padiskutueshëm, ndërsa vjeshtën e këtij viti debutoi dhe shënoi edhe golin e parë me Francën, duke u bërë futbollisti më i ri që vesh fanellën e “gjelave” dhe që shënon për të.
“Los Blancos” bëjnë merkato pa shumë bujë prej disa vitesh dhe kanë para mjaftueshëm për të paguar kartonin e mesfushorit te Rennes, por më së pari duhet të bindin vetë Camavingën të pranojë kalimin në “Santiago Bernabeu”.
Edhe vetë Zidane ka mbetur i mahnitur nga performanca e Eduardo Camavingës dhe ka nisur kontaktet me të, ndërsa pritet që së shpejti të dy të diskutojnë më gjerësisht, për një të ardhme madrilene të mesfushorit.
Ndërkohë drejtuesit e Rennes kanë bërë të qartë se nuk do të heqin dorë nga kartoni i mesfushorit pa arkëtuar më parë një shifër prej 50 milionë eurosh, shumë kjo që nuk përbën aspak problem për arkat e Realit, që vetëm merkaton e fundit e mbylli me një bilanc pozitiv prej afërsisht 100 milionë eurosh.
