Portugalia arriti një fitore shumë të rëndësishme mbrëmjen e djeshme, pasi ia doli të mposhte me rezultatin 3-0 Suedinë në shtëpi.
Formacioni i hedhur në fushë nga Fernando Santos dolën me tre pikë edhe pa Cristiano Ronaldon dhe tashmë kryesojnë grupin tre me 10 pikë së bashku me Francën.
Mungesa e yllit të Juventusit nuk u ndje pothuajse aspak, por ai nuk harroi ta mbështeste ekipin e tij. 35-vjeçari, i cili rezultoi pozitiv me Covid-19 para dy ditësh, është tashmë në izolim në shtëpinë e tij në Torino, duke ndjekur protokollin e UEFA-s.
Gjithsesi portugezi nuk nguroi të postonte një foto në rrjetet sociale, ku shfaqet në shtëpinë e tij pak minuta përpara se të fillonte sfida. “Sikur të isha atje! Forca Portugalia”, shkruan CR7 përkrah fotos. Postimi i tij nuk mbeti pa u komentuar nga fansat e shumtë, të cilët i urojnë atij shërim sa më të shpejtë.
Megjithatë disa prej tyre ngrenë pikëpyetje nëse ai është vetëm në shtëpi. “Kush e bëri foton nëse ai është në izolim”, është njëri prej komenteve. “Shikoni se sa i sëmurë që është. Kjo sëmundje duhet të ndalohet sa më shpejt”, ironizon një tifoz tjetër.
