Nga BoldNews.al
Kryeministri Edi Rama deklaroi se do të ndihej i zhgënjyer nëse SPAK, Prokuroria Speciale e pas-Reformës në Drejtësi, “nuk do të dërgojë pas hekurave” ata që ai i quajti “gjyqtarët dhe prokurorët e korruptuar”, të shkarkuar nga Vetingu.
Rama i artikuloi këto deklarata në një konferencë për mediat paraditen e kësaj të Marte, duke synuar të përforcojë rekomandimet klishe të zyrtarëve të Bashkimit Europian, të cilët kërkojnë thellimin e rezultateve të reformës së sponsorizuar prej tyre.
Megjithatë, kryeministri shqiptar duket se e thjeshtëzoi në maksimum kërkesën e partnerëve ndërkombëtarë, të cilët kanë vendosur si kusht kyç për integrimin e Shqipërisë në Bashkimin Europian luftën kundër korrupsionit në nivelet e larta shtetërore.
Kryeministri Rama nuk ka dhënë, deri më tani, asnjë koment mbi rastet, për të cilat SPAK ka nisur formalisht hetimet për procedura tenderash dhe koncensionesh, të shpërndara në mënyrë të dyshimtë nga institucionet qeveritare.
Për këto raste, të cilat nuk janë të pakta, duket se zhgënjimi më i madh për SPAK-un vjen nga qytetarët dhe opinioni publik në përgjithësi, të cilët ende nuk kanë parë ende hetime për “peshqit e mëdhenj”, drejtuesit e lartë shtetërorë.
Prokuroria Speciale (SPAK) e nisi funksionin e saj me “këmbën e gabuar”, kur hoqi dorë nga hetimi për krimin zgjedhor, në të cilat gjendeshin përgjime të bisedave ndërmjet zyrtarëve më të lartë qeveritarë dhe të Partisë Socialiste për tjetërsim votash në bashkëpunim me grupet kriminale.
Në ato përgjime rezultonin biseda “të lirshme” të Damian Gjiknurit, Ulsi Manjës, Vangjush Dakos dhe një grupi të gjerë zyrtarësh të niveleve të ndryshme të administratës shtetërore.
Heqja dorë nga hetimi i “peshqve të mëdhenj” të dosjeve tashmë të famshme “339” dhe “184” ishte zhgënjimi i parë, por jo i vetëm, i opinionit publik shqiptar dhe partnerëve ndërkombëtarë nga trupa e prokurorëve të SPAK-ut.
Më tej, Prokuroria Speciale SPAK ndërmori hetime për tenderin e dyshimtë për mbylljen e landfillit të Porto-Romanos, me një vlerë prej mbi 15 milionë euro.
SPAK e nisi hetimin pas publikimit të disa raportimeve nga “Boldnews.al”, në Shkurt të vitit 2020. Pas gati 10 muajsh, nga dosja “Porto Romano” nuk ka asnjë zhvillim.
Të njëjtin “fat” jo të mirë kanë edhe një seri hetimesh, për të cilat nga SPAK-u është mësuar se kanë nisur hetimet.
Disa tendera “sekretë” të zhvilluar nga Ministria e Shëndetësisë gjatë pandemisë, një pjesë e të cilëve janë përmendur për herë të parë nga “Boldnews.al”, tashmë janë në zyrat e prokurorëve të SPAK-ut.
Por, megjithëse hetimi për këto raste nuk është i vështirësisë maksimale, pasi nuk ka nevojë të kryhen hetime shumëplanëshe, sërish ato kanë mbetur “të stakuara” dhe pa asnjë lëvizje konkrete.
Një organizëm qytetar ka kallëzuar në Korrik të këtij viti atë që konsiderohet si “afera e koncensioneve në Shëndetësi”.
Nga SPAK nuk është parë asnjë lloj veprimi, më e pakta për të marrë në pyetje zyrtarët dhe ish-zyrtarët, të cilët kanë ideuar, hartuar dhe miratuar projektet koncensionare, të cilat po i marrin frymën jo vetëm Shëndetësisë, por edhe të gjithë buxhetit të shtetit shqiptar.
Kreu i SPAK-ut, Arben Kraja, në një prononcim për agjencinë BIRN pak ditë më parë, deklaroi se zyra e tij po e shqyrtonte çështjen e tenderave në Shëndetësi, por nuk ka nisur ende asnjë hetim penal.
Një tjetër kallëzim, ajo për “aferën e inceneratorëve”, është në duart e SPAK-ut që në pranverën e vitit 2020. Në atë çështje ka të dhëna të shumta që lidhin emrat e Damian Gjiknurit dhe Arben Ahmetajt me kontratat koncensionare në fushën e përpunimit të mbetjeve urbane.
