Edi Reja, trajneri i Shqipërisë, pas ndeshjes së barazuar ndaj Lituanisë, ka folur për RTSH duke u ndalur te komenti i ndeshjes dhe duke i vënë edhe fajin arbitrit që nuk akordoi një 11-metërsh:
“Ishte prekje dorë e pastër, pengoi topin! Na u mohua një penallti që mund të ndryshonte ndeshjen. Patëm disa raste të mira për të zhbllokuar sfidën dhe nuk e bëmë dot. Nëse nuk shënon dot me kaq raste, atëherë ndeshja mbyllet barazim”.
“Provova dhjetë lojtarë të rinj dhe disa i fituam. Do t’i rivlerësoj në të ardhmen. Sigurisht që këto ndeshje duhen fituar, ashtu si ndaj Kazakistanit, ku krijuam shumë raste për gol. Ne krijojmë por nuk finalizojmë”.
Në tre ndeshjet e fundit, Shqipëria ka marrë 1 humbje dhe 2 barazime duke mos shënuar asnjë gol. Tregues këto që problemet shkojnë përtej formës momentale të futbollistëve apo disa mungesave në ekip.
