Kryetari i Partisë Demokratike, Lulzim Basha deklaroi se kryeministri Edi Rama po përgatit një tjetër aferë korruptive me inceneratorët.
Gjatë konferencës për gazetarët këtë të Mërkurë, Basha tha se të paktën 100 milionë euro janë planifikuar të akordohen për inceneratorët nga Bashkia e Durrësit. Plani, sqaroi ai, është që kryetarja aktuale e bashkisë të shkarkohet, pasi nuk pranon të firmosë shkresën e transferimit të fondeve dhe në vend të saj do komandohet një deputete e PS-së. Kjo e fundit, tha Basha, është caktuar të jete Milva Konomi dhe plani është që të firmosë me urdhër të Ramës.
“Për inceneratohrët po bëhet gati ta shkarkojë për herë të pestë apo të gjashtë kryetarin e Bashkisë së Durrësit. Se nuk pranon zonja që s’ja dimë emrin se s’kemi si t’ja dimë, se i ndërrojnë më shpesh se sa shefat e kadastrës së Vlorës, nuk pranon të firmosë një aferë qindra milionëshe për të çuar lekët te inceneratori i Tiranës. Dhe po bëjnë gati Milva Konomin, që të japë dorëheqjen si deputete që të komandohet atje, që të firmosi shkresën e të vjedhin paratë me inceneratorët. Këtu e ka mendjen ai. Mos kujtoni se e ka diku tjetër”, tha Basha.
“Ky është plani. A do ta ndryshojë pas denoncimit që i bëra unë, mbetet për tu parë. Plani është Milva Konomi të japë dorëheqjen si deputete, të komandohet nënkryetare, të iki kjo nënkryetarja e tretë, e katërt, apo e pestë atje, dhe të firmosi shkresën për të çuar të paktën 100 mln inceneratorëve. Gjithçka te Edi Rama është e lidhur me paratë që i grabiten shqiptarëve dhe i shkojnë oligarkëve, e në veçanti afera e tmerrshme e inceneratorëve të plehrave”, shtoi ai.
