Kryeministri Edi Rama përjashtoi këtë të Martë një tjetër paketë ndihmëse për ekonominë.
“Këto paketat duhet ti harrojmë për një arsye shumë të thjeshtë, sot jemi në kushtet kur të gjithë kemi mundësi të punojmë, natyrisht të shtrënguar. Nëse flasim për paketa mendojmë për sot dhe harrojmë që ka ditë dhe nesër, ka jetë dhe nesër”, tha Rama në një konferencë për mediat.
Nga ana tjetër, PD i ka bërë apel kryeministrit Edi Rama të miratojë planin me 5 pika të “Rimëkëmbjes Ekonomike”. Kryedemokrati Lulzim Basha ka deklaruar se Rama do të ndiqet penalisht nëse nuk miraton paketën ekonomike të propozuar nga Partia Demokratike.
Plani me 5 pika i PD parashikon: Çek prej 1000 euro për biznesin e vogël për 6 muajt e ardhshëm për të zbutur barrën e pagesave më urgjente; Vendosja e një tavani prej 2% të normës së interesit për biznesin dhe subvencionimi i çdo norme interesi mbi këtë nivel për kredimarrjet për investime dhe shpenzime operative; Zgjatja e afatit dhe zgjerimi i kritereve të përfitimit nga garancia sovrane në favor të një numri më të madh biznesesh prodhuese; Mbështetja e biznesit me një pagesë mujore prej 200 mijë lekësh për 6 muajt e ardhshëm për çdo punëtor që rimarrin në punë; Pagesa mujore prej 160 mijë lekësh për çdo shqiptar që ka humbur punën dhe shtesa mujore prej 20 mijë lekësh për çdo pensionist për 6 muajt e ardhshëm; Subvencionim i 50% të qirasë ose heqje e taksës së pronës për biznesin prodhues dhe punëdhënësit e mëdhenj.
