Vendimi i qeverisë për mbajtjen e detyrueshme të maskave edhe në ambientet e hapura ka ngritur shumë pikëpyetje. Ky ligj i cili do të hyjë në fuqi ditën e enjte, u diskutua sot në emisionin “Shqipëria Live”.
Në një lidhje të drejtpërdrejtë ishte eksperti Erion Dasho, i cili u shpreh se maskat nuk kanë efekt në ambientet e jashtme. “Parimi i markës kirurgjikale është që unë të mbroj të tjerët nga vetja. Nëse personat respektojnë distancën 2 metra, apo janë në një rrugë ku nuk ka shumë njerëz, nuk janë shumë pranë njëri-tjetrit, atëherë nuk është e nevojshme maska”, tha Dasho.
Eksperti shtoi se maska mbron, por jo nga virusi. “Virusi nuk qëndron në ajër vetë, qëndron në ajër nga spërklat. Pra maska mbron nga spërklat që mbartin virusin”, vijoi ai.
Dasho gjithashtu u shpreh se maska nuk krijon vështirësi në frymëmarrje te njerëzit e shëndoshë. “Maska krijon vështirësi vetëm tek ata persona që janë të sëmurë dhe që kanë probleme me frymëmarrjen”, tha ai.
Kujtojmë se më herët, Dasho ka thënë se masat për mbajtjen e maskës në rrugë janë të “paefektshme dhe hipokrite”. “Kur maskat nuk mbahen në njësi tregtimi dhe transporti, duhet t’ia lënë vendin masave strategjike të drejtuara nga trinomi testo-gjurmo-trajto! Shëndeti i shqiptarëve është në rrezik dhe ata po e humbin jetën me ritme disa fish më të larta se qytetarët e tjerë europianë! Boll me amatorizma!!! Ka ardhur koha për profesionalizëm!!”, shprehej Dasho.
