Shtyhet procesi për të pandehurit e dosjes 339. Shkak është bërë vendimi i gjykatës për të pasur kohe edhe një jave me qëllim njohjen me aktet në dosje dhe për të vendosur lidhur me kërkesat e 11 të pandehurve për gjykim të shkurtuar.
Vetëm Astrit e Altin Avdylaj kanë kërkuar të gjykohen në gjykim të zakonshëm, ndërsa pjesa tjetër e të pandehurve, Jasin Kala, Gjevi Ndoka, Esat Mehmeti, Hajri Seferi, Shkelqim Avdylaj, Denis Llaftiu, Elton Shehaj, Hekuran Hoxha, Xhevit Shuti, Flamur Cela dhe Vehbi Berushi presin vendimin e gjykatës nëse do të pranohet ose jo kërkesa për gjykim të shkurtuar.
Vendimi i gjykatës pritet të merret të hënën e ardhshme. Të gjithë të pandehurit akuzohen për veprat penale “Trafikimi i narkotikëve”, “Prodhimi dhe fabrikimi i lëndëve narkotike dhe psikotrope”, në bashkëpunim, në formën e posaçme të grupit të strukturuar kriminal, “Grupi i strukturuar kriminal”, “Kryerja e veprave penale nga organizata kriminale dhe grupi i strukturuar kriminal”, “Pastrimi i produkteve të veprës penale”, në bashkëpunim, “Prodhimi dhe shitja e narkotikëve”, në bashkëpunim.
