Dy deputetë nga Kuvendi i Republikës së Maqedonisë së Veriut kanë rezultuar pozitiv, me koronavirus.
Kryeministri maqedonas mendon se pushteti dhe opozita duhet të arrijnë marrëveshje për të punuar online, duke bërë me dije se edhe seanca e ardhshme qeveritare do të jetë online.
“Besoj që Parlamenti menjëherë do të kalojë në opsionin online, nëse deputetët ashtu merren vesh, në pajtim me Rregulloren. Qeveria seancën e ardhshme të martën do ta mbajë online. Ne ende nuk kemi ndonjë person me simptome ose të infektuar, por me rekomandim të minstrit Venko Filipçe dhe Komisionit për mbrojtje shëndetësore, na është thënë se në pajtim me numrat, duhet të përgatitemi për seancën online qeveritare.
Besoj se edhe Kuvendi do të jetë i mençur dhe do ta vendos punën online, pasi që këtë e kanë bërë, sa mund të vërej, pothuaj të gjitha parlamentet në rajon dhe Evropë”, tha Zaev. Deputeti i LSDM-së, Laze Tanevski, ka njoftuar sot nëpërmes facebook se është pozitiv me covid-19. Ndërkaq, dje, shërbimet informative të kuvendit informuan për deputetin Ismail Jahovski nga BDI-ja.
