Presidenti Ilir Meta i ka bërë sërish apel kryeministrit Edi Rama të vërtetojë akuzat që lëshoi ndaj kreut të shtetit.
“I kam bërë një letër zyrtare asamblesë së PS-së. Kryeministri i tyre dhe kryetari i PS-së tha se Presidenti takon skutave njerëzit me rekorde kriminale, takon skutave njerëz që ndiqen nga OFL dhe iu kërkon angazhime për zgjedhje dhe vota. Unë i kam bërë një letër asamblesë dhe jo zotërisë dhe ti thotë shqiptarëve kë ka takuar presidenti skutave. Kur dhe vendin, orën, ditën”, tha Meta në një prononcim për gazetarët nga Malësia e Madhe ku ishte këtë të Shtunë në kuadër të një aktiviteti.
Meta tha se Rama po punon kundër integrimit të Shqipërisë në BE dhe kundër Kosovës.
“Qeveria është rrëzuar prej kohësh. Qeveria ka rrëzuar veten dhe ka 0 legjitimet për sa kohë shkatërron procesin zgjedhor, i vë kazmën marrëveshjes së 5 qershorit, se e di se do ketë një humbje dhe kujton se mund të shantazhojë për ta minimizuar. Unë jam me 5 qershorin”, tha po ashtu kreu i shtetit.