Ish-trajneri i Juventusit, Fabio Capello, deklaron se Interi është ekipi favorit për titullin kampion në Serie A.
Në një intervistë për “Corriere dello Sport’, italiani ka bërë një analizë të skuadrave pretendete për “Scudetto” si dhe është ndalur tek situata aktuale e coronavirusit në Itali.
“Unë kam besim se sezoni do të përfundojë normalisht. Së pari ne duhet të kuptojmë se duhet të jemi më të kujdesshëm seç kemi qenë. Kur rastet filluan të uleshin ne vepruam gabim.
I bëj thirrje lojtarëve se ato duhet të jenë më të kujdesshëm nga të gjithë dhe duhet ta fiksojnë mirë se ky është një sezon ndryshe nga të tjerët. Kërkohet vetëm maturi. Mendoj se nuk është shumë për futbollistë që paguhen mirë”.
“Titulli? Për sa i përket kampionatit shikoj favorit Interin. Ata nuk i shitën yjet, por blenë edhe të tjerë. Pesë zëvendësimet e lejuara do ta ndihmojnë më shumë Conten për sa i përket formacionit”.
“Juventusi? Ata nuk luajtën kundër Napolit, pasi aty do të kuptonim vërtet se ku është kjo Juve. Pirlo nuk do ta këtë të lehtë me kaq shumë sulmues që ka në dispozicion”.
“Atalanta do të jetë gjithmonë aty dhe tashmë që kanë fituar dhe ekperiencë europiane do të jenë më të rrezikshëm. Gjithashtu edhe Napoli i Gattusos nuk do të qëndrojë në hije. Në fund vijnë Milan dhe Roma të cilat mbeten për t’u parë se sa larg mund të shkojnë këtë vit”, mbyll ish-trajneri i kombëtares angleze.
