Rabiana Halili, bën “qokën” e fundit, liroi Edmond Koçin me pretendimin se dyshonte që ishte me “COVID-19”. KLP, miratoi dy ditë më parë dorëheqjen dhe largimin nga sistemi të prokurores Rabiana Halili.
Edmond Koçi, pronar me 32.5 për qind në kompaninë “Liburnet 1” për ngarkim-shkarkim në Portin e Durrësit. Policia i gjeti pistoletë dhe 98 plumba.
Edmond Koçi ose siç njihet ndryshe në Durrës me nofkën “Mond Çekiçi”, nuk ka qëndruar asnjë ditë në burg, megjithëse policia e këtij qyteti, në 24 shtator 2020 e arrestoi në flagrancë mbi një motor, për akuzën e mbajtjes pa lejë të një pistolete, prodhim austriak të quajtur “Steyer” kalibër 9 mm.
Skandali i lirimit të Edmond Koçit nga burgu, duket se është “orkestruar” nga avokatët e “Mond Çekiçit”, mjekët e Durrësit dhe prokurorja e çështjes, Rabiana Halili, e cila mësohet se gjatë caktimit të masës së sigurisë, i ka kërkuar gjyqtarit, Petraq Çuri, të lerë në “arrest shtëpie” dhe jo “arrest në burg”, Edmond Koçin, që në Durrës njihet si pjesë e klanit të “Bandës së Durrësit”.
KLP-së tha se ishte miratuar kërkesa për largimin vullnetar nga puna të prokurores Rabiana Halili, duke bërë që automatikisht ajo të dalë jashtë sistemit të drejtësisë.
Nga verifikimet e kryera rezulton se Edmond Koçi, është një nga aksionerët e kompanisë “Liburnet 1” që kuperon me ngarkim-shkarkimin e mallrave në Durrës. Kjo kompani është rregjistruar në 7 korrik 2005 dhe Edmond Koçi, zotëron 32.5 për qind të aksioneve. Ndërsa aksionerët e tjerë të saj janë Altin Bejko, Ibrahim Mani dhe Elvis Mehmetaj. Futja në këtë kompani e “Mond Çekiçit” është realizuar në 19 nënëtor 2011, kur së bashku me aksionerët e tjerë i ka blerë kompaninë Petrit Hanit. Vlera e blerjes së këtij biznesi fitimprurës të ngarkim-shkarkimit në Portin e Durrësit, në vitin 2011 sipas kontratës private dhe jo të noterizuar tek noteri, ka qënë vetëm 150 mijë lekë të vjetra. Ndërkohë në një raport të ministrisë së brendshme të botuar në vitin 2016 thuhej se “Mond Çekiçi”, është pjesë shoqërore me Lulzim Berisha “Luli”, Emiljano Shullazi “Mili”, Plarent Dervishaj “Lenti”, Marjel Fierza, Julian Meçaj dhe persona të tjerë.
