Greva e naftëtarëve ka hyrë këtë të Mërkurë në ditën e 10, ndërkohë që gjendja e tyre shëndetësore është përkeqësuar.
Një prej grevistëve ka pasur tension të lartë dhe u dërgua në spital për të marrë mjekim më të specializuar. Ndërkohë, edhe sipas mjekëve, tre prej grevistëve të tjerë kanë pasur agravim të shëndetit dhe duhet të shkojnë në spitalin e Ballshit, por ata kanë refuzuar. Kështu që kontrollet shëndetësore u kryen brenda ambienteve të qendrës ku naftëtarët po zhvillojnë grevën e urisë.
Kryetari i Sindikatës së Naftëtarëve, Sokol Dautaj deklaroi se grevisti i larguar do të zëvendësohet.
“E theksoj, këtu ka dritë jeshile nuk është çdo gjë e zezë. Është ndërmarrje fitimprurëse, por hyjnë e largohen operatorë që falimentojnë. Nuk falimenton rafineria. Ata e dinë ndaj e hedhin topin nga një anë në tjetrën. Por ata tallen me ne”, tha ai.
Një ditë më parë, i pyetur nga gazetarët, kryeministri Edi Rama tha se nuk mund të fajësohet qeveria për gjendjen ku ndodhen naftëtarët.
“Ajo është një kompani private e privatizuar në mënyrë kriminale dhe janë pasojat e një procesi privatizimi kriminal ku ne jemi përfshirë në mënyrë të vazhdueshme për të lehtësuar dhe mbështetur ata njerëz që janë aty duke bërë lloj lloj akrobacirash e lutjesh që ajo ndërmarrje të mund të vazhdojë normalisht“, deklaroi Rama.
Po dje, naftëtarët i vizitoi dhe kryedemokrati Lulzim Basha, i cili u premtoi se me ardhjen e PD-së në qeverisje të vendit, ata do të marrin pagat e prapambetura.
