Gjatë monitorimit me radar në aksin rrugor Sauk-Teg, Policia bën me dije se janë pezulluar 23 leje drejtimi, nga këto 12 për shpejtësi tej normave të lejuara dhe 11 për drejtim mjeti nën efektin e alkoolit.
Sipas policisë nga kontrolli me radar, mësohet janë regjistruar shpejtësi nga 151 km/h deri në 173 km/h.
Ndërkohë 6 drejtues mjetesh janë arrestuar, nga të cilët 3 për drejtim mjeti në gjendje të dehur dhe 3 që drejtonin mjetet pa leje drejtimi.
“Drejtues mjetesh: Rruga është e të gjithëve dhe jeta është e shtrenjtë. Shpejtësia, alkooli, garat, të presin rrugëtimin e jetës. Guxim! Vetëbesim i tepruar! Apo papërgjegjshmëri ndaj jetës? Cilado qoftë arsyeja, drejtimi i mjetit në këtë mënyrë është i pa pranueshëm dhe vrastar”, thuhet në apelin që policia i drejton qytetarëve përmes rrjeteve sociale.
