Teksa poston një kronikë që tregon për mungesën e investimeve dhe kushtet e këqija të infrastrukturës në një lagje të Elbasanit, Presidenti Ilir Meta apelon për përmirësimin e shërbimeve ndaj qytetarëve.
Meta shprehet se është shumë e rëndësishme që 61 bashkitë të përqendrohen në përmirësimin e shërbimeve ndaj qytetarëve dhe jo në “kapjen” e votave me pahir dhe presione ordinere me bukën e gojës.
Në një reagim në FB, Meta shprehet se rritja e taksave që paguajnë qytetarët nuk u është kthyer në shërbime më të mira, përkundrazi në degradim të tyre.
Kur kjo ndodh në Elbasan, shkruan ai, mendoni në bashkitë e tjera.
“Çdo zyrtar të bëjë detyrën me përgjegjësi të lartë ndaj qytetarëve dhe komunitetit. Fatkeqësisht reforma administrative u keqpërdor për të përqendruar pushtetin vendor në pak duar e jo për të përmirësuar shërbimet ndaj qytetarëve. Taksat e qytetarëve të mos keqpërdoren për të shtuar fondin e pagave për fushatë partie, por për të përmirësuar shërbimet ndaj qytetarëve. NDAL abuzimit me pushtetin vendor nga cilido”, e mbyll reagimin kreu i shtetit.
