Ministria e Arsimit ka vendosur të shtojë 1 000 mësues në sistemin arsimor. Ish-deputetja e PD-së Albana Vokshi shprehet se vendimi erdhi pas shumë javësh kërkesa të përditshme të Partisë Demokratike dhe mund të përdoret thjesht për punësime elektorale të mësuesve militantë të PS-së. Kjo pasi sipas saj, portali “Mësues për Shqipërinë” ka dështuar e vlen vetëm për propagandën e Ramës.
Teksa publikon dokumente, ajo shprehet se rasti i punësimit të mësuesve në Fier, e dëshmon këtë. Nuk punësohet ai që renditet i pari në listë, por punësohet ai që renditet i 27, 28, 48 e kështu me radhë, shton Vokshi.
Ish-deputetja thotë se, qeveria duhet të bëjë procedura pranimi transparente e ne bazë meritokracie.
Rama të mos paguajë për inceneratorët e tij e të Veliajt me milairda leke, por të sigurojë shkollat dhe mësim cilësor, apelon Vokshi.
Për këtë nuk mjafton një masë gjysmake e marrë nën presionin e vazhdueshëm të PD, por, – thotë Vokshi – duhet me urgjencë të alokojë fonde për:
- Testimin serologjik dhe testimin periodik me tampon për të gjithë mësuesit në të gjithë vendin;
- Sigurimi i kushteve higjeno – sanitare të domosdoshme për në kohë pandemie e në reapektim të protokollit të sigurisë
- Sigurimi i mjeteve mbrojtëse falas për mësuesit e për nxënësit (maska, dezinfektantë).
- Desinfektimi i shpeshtë, të cdo shkolle, sic edhe protokolli i sigurisë e kërkon.
- Pagesë e plotë për cdo orë shtesë, si dhe shpërblim mujor për cdo muaj mësimdhenie në kohë pandemie.
“Shëndeti dhe jeta e çdo nxënësi dhe e çdo mësuesi është e shenjtë”, e mbyll reagimin në rrjetet sociale, Albana Vokshi.
