Andi Zeqiri, sulmuesi 21-vjeçar me origjinë nga Kosova është transferuar zyrtarisht te klubi i Brighton, që militon në Premier League-n angleze.
I lindur dhe rritur në Lozanë, Zeqiri është rritur te skuadra e qytetit, me të cilën ka debutuar edhe në futbollin profesionist, ndërsa sezonin e kaluar ndihmoi ekipin që të ngjitet në Superligën e Zvicrës, duke shënuar 22 gola.
Futbollisti ka pasur edhe një eksperiencë të shkurtër te të rinjtë e Juventusit, ndërsa pikërisht në ambientet e klubit bardhezi kreu edhe vizitat mjekësore të hënën, për t’u nisur rezultatet drejtuesve të klubit të Brighton.
Andi Zeqiri ka përfaqësuar Zvicrën në të gjithë nivelet deri te skuadra U21, por së fundi ka konfirmuar se do të veshë fanellën e Kosovës.
Edhe babai i tij konfirmoi për Supersport se Andi ka kryer të gjithë procedurat e nevojshme dhe po pret lejen e FIFA-s për të veshur fanellën e “Dardanëve”.
