Treguesit e pandemisë së COVID-19 vazhdojnë të përkeqësohen në Europë, veçanërisht në Francë, ku qeveria do të bëjë sot njoftime të reja dhe në Spanjë ku autoritetet do të vendosin një kufizim tjetër në Madrid pas një mosmarrëveshjeje të gjatë me autoritetet lokale.
“Qeveria do të marrë masat e nevojshme në funksion të zhvillimit të epidemisë”, deklaroi presidenti francez, Emmanuel Macron duke shtuar se ministri i Shëndetësisë, Olivier Veran, do të njoftonte vendimet gjatë një ndërhyrjeje sot në orën 18:00 (16:00 GMT).
Kryetarët e bashkive dhe presidentët e metropoleve të Parisit, Lionit, Lille dhe Grenobles u pritën sot në Matignon, selinë e qeverisë.
Të vendosura tashmë në një zonë alarmi të përforcuar, sinonim i mbylljes së bareve nga ora 22:00, e disa aktiviteteve të caktuara sportive, Parisi ka arritur kriteret teorike për të kaluar në gatishmëri maksimale.
Për Madridin, tashmë është bërë. Një dekret nga Ministria spanjolle e Shëndetësisë botuar dje shtrin në të gjithë kryeqytetin masat tashmë në fuqi që prej një jave në zonat e rajonit më të prekur nga virusi dhe ndalon banorët e Madridit të hyjnë ose të lënë qytetin përveç rasteve për të shkuar në punë, te mjeku ose për t’i çuar fëmijët në shkollë.
Prandaj nuk bëhet fjalë për një izolim të rreptë pasi Spanja e përjetoi atë në pranverë.
Njoftimi, i cili vjen pas një përplasjeje dy-javore mes qeverisë qendrore të krahut të majtë dhe ekzekutivit rajonal të Madridit të krahut të djathtë, u refuzua menjëherë nga kjo e fundit.
Por, pavarësisht refuzimit të Madridit dhe rajoneve të tjera, këto masa janë të detyrueshme brenda 48 orëve sipas dekretit.
/ata/
