Një 35-vjeçare e cila për katër vite të shkuara ka pastruar dyshemetë dhe zyrat në godinën e bashkisë së fshatit Povalikhino, do të ulet në karrigen e kryetarit.
Bëhet fjalë për Marina Udgodskaya, e cila fitoi zgjedhjet vendore në fillim të muajit shtator, ndonëse ishte futur në garë në mënyrë që Nikolai Loktev të mos kishte një kandidat të vetëm.
Ishte pikërisht Loktev ( Partia Bashkimi) ai që bindi 35-vjeçaren që të regjistrohej në garë për ta rivalizuar, pasi asnjë banor i fshatit nuk doli për të garuar kundër tij, dhe ligji kërkon që për postin e kryetarit të kandidojnë minimalisht dy kandidatë.
Por plani shkoi tmerrësisht keq, pasi njerëzit votuan masivisht për pastruesen, duke i dhënë 64% të votave.
“Ai mendonte se askush nuk do ta mundte dhe se do të ruante vendin e punës. Por njerëzve u kishte ardhur në majë të hundës dhe zgjodhën Marina Udgodskaya-n”, tha për BBC një pjesëtar i komisionit vendor të zgjedhjeve.
Udgodskaya tha megjithatë se ndihej një kandidate “false” dhe se nuk është gati për postin e kryetarit të bashkisë.
