Pas humbjes befasuese kundër Hoffenheim, klubi I Bayern Munich merr një tjetër goditje. Trajneri Hansi Flick, i cili foli sot në një konferencë shtypi në prag të Superkupës së Gjermanisë kundër Borussia Dortmund, u përqendrua në kushtet fizike të Leroy Sané dhe David Alaba teksa konfirmoi dëmtimet e tyre.
“Alaba ka probleme muskulore, ne duhet të shohim se si zhvillohet gjendja e tij. Sa i përket Sané është i dëmtuar dhe ne shpresojmë që ai do të kthehet pas pushimit të ekipit kombëtar. Ai ka një dëmtim kapsular në gju”.
Për Sane flitet për një mungesë nga 3-4 javë jashtë fushave të blerta. Nuk është hera e parë që gjermani dëmtohet pasi deri tani në karrierë Sane ka pasur shumë dëmtime të tjera, duke filluar nga ai i rëndi me Manchester City.
Finalja e Superkupës së Gjermanisë, mes Dortmund dhe Bayern Munich luhet nesër ora 20:30.
