Faktori ndërkombëtar po shton presionin ndaj mazhorancës për të mos shkelur marrëveshjen e 5 qershorit.
Pas deklaratave të djeshme të ambasadores së SHBA Yuri Kim dhe atij të BE Luigi Soreca, sot ishin eurodeputeti David Lega dhe nënkryetari i CDU/CSU, Johann David Wadephul, që deklaruan se palët duhet të arrijnë konsensus në Këshillin Politik.
Për publicistin Ilir Demalia, kryeministri Edi Rama do veprojë ashtu siç do ai vetë.
“A do tërhiqet Rama? Rama do bëjë sikur do tërhiqet ashtu siç ka bërë deri më sot. Në televizionin tuaj unë kam thënë që në fillim kur u krijua komisioni për reformën zgjedhore me opozitën jashtëparlamentare, Rama e bën këtë për të fituar kohë. Në fund do veprojë ashtu siç do ai dhe vepron në mënyrë të ligjshme. Këtë e tha edhe Gjiknuri sot. Propozimet që ka opozita jashtëparlamentare ne do t’ia përcjellim Komisionit të Ligjeve në parlament. Pra, çdo gjë do vendoset në parlament. Sa i takon retorikës së ndërkombëtarëve, unë mendoj se kjo retorikë tashmë është konsumuar dhe mua më vjen keq që e gjithë klasa politike dhe mediat e bëjnë faktor detrerminues”.
Në një lidhje përmes Skype për “RTV Ora”, Demalia tha se retorika e ndërkombëtarëve tashmë është e konsumuar.
Sipas tij, marrëveshjet e firmosura në prani dhe me ndërkombëtarët, gjithmonë janë shkelur.
“Ndërkombëtarët kanë influencë dhe kontribut, por sjellin edhe dëm të madh me këtë që mbështesin here një palë e herë një palë tjetër. Po nuk qe e ndërgjegjshme vetë klasa politike shqiptare, që për 30 vjet ka punuar se si t’ia hedhin njëra-tjetrës, pa patur asnjë vision për të ndërtuar shtetin e së drejtës , asnjë vullnet për të ndërtuar intitucione të pavarura. Ndërkombëtarët kanë 30 vjet që ulen dhe bëjnë marrëveshje. Ato marrëveshje shkelen prapë nesër. Pjesa më e madhe e njerëzve nuk i kuptojnë listat e hapura apo listat e mbyllura. Të gjitha këto janë një lloj retorike, ku rezultati do jetë po i njëjtë”.
