Ministria e Shëndetësisë ka nisur procedurat për një tender të dytë “sekret” për maska dhe materiale mbrojtëse anti-covid, pas atij që zhvilloi në Prill 2019.
Edhe pse tenderat “sekretë” të zhvilluar nga institucioni i drejtuar nga Ogerta Manastirliu janë tashmë objekt i Prokurorisë Speciale (SPAK), Ministria e Shëndetësisë duket e vendosur të vijojë me të njëjtat procedura të dyshimta.
Tenderi që po përgatitet së fundi ka një vlerë prej rreth 5.9 miliardë lekë të reja, ose rreth 5 milionë euro, një shifër thuajse dyfish më e lartë se sa fondi për procedurën e parë “sekrete” për blerjen e maskave anti-Covid.
“Boldnews.al” ka mësuar se ky tender ishte parashikuar të zhvillohej në 18 Shtator, por zyrtarët e Ministrisë së Shëndetësisë kanë vendosur ta shtyjnë për disa ditë.
Shkak për shtyrjen është bërë vendimi i Ministrisë së Shëndetësisë vetëm dy ditë para zhvillimit të tenderit, konkretisht në 16 Shtator, për të ndryshuar disa nga specifikimet teknike, lëvizje e cila krijon dyshime për orientimin e procedurës drejt një fituesi të paracaktuar.
Dyshimet janë se “fituesi i paracaktuar” mund të jetë e njëjta kompani që ka marrë tenderat më të mëdhenj të zhvilluar nga Ministria e Shëndetësisë gjatë periudhës së pandemisë.
/Boldnews.al/
