Rrugëtimi i Hansi Flick si trajner i parë i Bayern Munchen nisi më 6 nëntor 2019 me ndeshjen e fazës së grupeve të Champions League në shtëpi kundër Olympiacos.
Pasi ishte shkarkuar Niko Kovac, drejtuesit bavarezë i besuan stolin Flick-ut, por si trajner provizor deri sa të sillnin një emër të madh.
Ndeshje pas ndeshjeje Bayerni jo vetëm nisi ngjitjen pas atij fillimi zhgënjyes të sezonit, por edhe loja ishte bindëse dhe gjithçka nisi të funksionojë siç dëshironin në klubin kampion të Gjermanisë.
Fundi është i pabesueshëm. Fillimisht tripleta e trofeve (kampion i Bundesligës, Kupa e Gjermanisë dhe Champions League) dhe mbrëmë fitorja e Superkupës së Europës bëjnë që të thyhet çdo rekord i mundshëm.
Hansi Flick ka më shumë trofe të fituar (4) sesa humbje dhe barazime të marra së bashku (3).
Nën drejtimin e Flick, Bayern Munchen ka luajtur në të gjitha kompeticionet zyrtare 38 ndeshje, 35 fitore, 2 humbje, 1 barazim.
Dy humbjet e Bayernit janë në kampionat ndaj Borussia Moenchegladbah dhe Bayer Leverkusen, ndërsa barazimi i vetëm është me Leipzig.
Ndeshja e mbrëmshme me Sevillan, pavarësisht se koha e rregullt përfundoi 1-1, përfshihet te fitoret, pasi i dha Bayernit dhe Hansi Flick trofeun e katërt sezonal.
