Dy persona, mes tyre një gardian burgu, janë vënë në pranga pasi u kapën në Gramsh, duke transportuar refugjatë sirianë.
Burime zyrtare nga policia sqaruan se, aksioni që çoi në ndalimin e tyre erdhi pas informacioneve të marra në rrugë operative se ata transportonin nga Korça, disa shtetas nga vendet e treta, me qëllim dhënien ndihmë për kalim të paligjshëm të kufirit.
E.Gj., 24 vjeç, banues në Tiranë dhe S.H., 59 vjeç, banues në Gramsh, u vunë në pranga.
Arrestim i shtetasit E.Gj. u bë për veprën penale ‘Dhënia ndihmë për kalim të paligjshëm të kufijve’, ndërsa arrestimi i shtetasit S.H. (punonjës policie në IEVP Peqin), i cili ka qenë me uniformë policie në momentin e arrestimit, u bë për veprat penale ‘Mbajtja pa të drejtë e uniformës’ dhe ‘Shpërdorimi i detyrës’.
Ata u kapën nga shërbimet e Policisë, në qytetin e Gramshit, duke transportuar me mjetin e tyre, 6 shtetas sirian, për të kaluar kufirin, me destinacion vendet e BE-së.
Në cilësinë e provave materiale u sekuestruan 4 aparate celular, një armë zjarri, stema dhe dokumenti i policisë i shtetasit S.H., si dhe mjetin me të cilin qarkullonin.
“Në bashkëpunim me Prokurorinë e Rrethit Gjyqësor Elbasan vazhdojnë hetimet për vënien para përgjegjësisë ligjore të personave të tjerë të përfshirë në këtë aktivitet kriminal”, njoftoi policia.
