Kryeministri Avdullah Hoti ka paralajmëruar shtrëngim të masave për të menaxhuar valën e dytë të koronavirusit. Edhe pse tha se vendi është në rrugën e duhur sa i përket përgatitjeve për dimër dhe se e kanë vënë në kontroll pandeminë, theksoi se pavarësisht presioneve për lirim të masave prioritet do të jetë jeta e qytetarëve.
Kreu i qeverisë gjatë një diskutimi me drejtorët e Klinikave në ShSKUK sot premtoi edhe riorganizim dhe ristrukturim të thellë në sektorin e shëndetësisë. Ndërkohë tha se bluzat e bardha do të kenë edhe stimulime financiare.
Ministri i Shëndetësisë, Armend Zemaj kërkoi dinamikë dhe përgjegjësi më të madhe nga mjekët, nërsa tha se do ketë riorganizim shtesë për ngritje të shërbimeve shëndetësore.
Ndërsa, drejtori i Emergjencës, Basri Lenjani ngriti shqetësimin lidhur me adaptimin e objektit të ri të emergjencës për COVID-19.
Javëve të fundit ka pasur ulje të rasteve me Covid në dallim nga muaji korrik dhe gusht.
