Mbledhja e rilindasve pasditen e sotme nuk ka shkuar ashtu siç pritej, këtë e tregon qartë edhe fotoja e mëposhte, ku siç shihen numri dy i PS, Taulant Balla dhe përfaqësuesi rilindas në Këshillin Politik, Damian Gjiknuri, kanë patur një debat mjaft të tensionuar pas takimit me Ramën.
Ajo që u bë e ditur në media ishin kritikat e forta dhe tonet kërcënuese që Rama përdori ndaj vartësve të tij në mbledhje, veçanërisht ndaj drejtorëve, por tensioni mes Ballës dhe Gjiknurit tregon se përplasjet brenda rilindjes janë edhe më të forta.
Por çfarë i ka shkaktuar përplasjet dhe tensionet mes Ballës dhe Gjiknurit?
Si Balla ashtu edhe Gjiknuri janë dy nga figurat më të besuara të Ramës në parti, madje ai ju ka besuar të dyve edhe poste mjaft të rëndësishme, të parin e ka bërë numrin dy të PS-së, ndërsa të dytin e ka dërguar si përfaqësues të Këshillit Politik, pasi i beson shumë eksperiencës së tij në zgjedhje, pasi vetëm një si Damiani mund të shkaktojë ‘tërmet’.
Por mesa duket asnjëri dhe as tjetri nuk janë të kënaqur me shpërblimet që ju ka dhënë shefi, pasi secili në hesap të tij mendon se meriton shumë më tepër, aq më shumë në këtë moment kur është hapur sërish ‘loja’ e ministrave dhe secili nga të dy pretendon të kapë një post në qeveri, për të marrë edhe atë pak çfarë ka mbetur nga copa e pushtetit.
Ajo që dihet tashmë është ëndra e madhe e Ballës për tu bërë Ministër i Brendshëm, ndërkohë që Gjiknuri i cili ja ka ndier edhe më herët lezetin ministrisë, pretendon të vihet sërish në ndonjë post kyç, në fund të fundit çfarë ka më shumë Arben Ahmetaj i cili u hoq nga Ministria e Financave dhe u vu të ‘ruajë’ miliona eurot për rindërtimin e Shqipërisë pas tërmetit.
Një tjetër arsye se pse Balla dhe Gjiknuri mund të jenë përplasur me njëri-tjetrin mund të jenë edhe zonat që Rama ju ka lënë për zgjedhje, ku Damianin e ka emëruar në Vlorë, një zonë mjaft e vështirë për hir të së vërtetës pasi besueshmëria e qytetarëve aty është zero pas zhgënjimit që patën me Ramën, ndërsa Ballën e ka lënë sërish në një zonë komode siç është ajo e Elbasanit.
Gjithashtu një tjetër pikë e nxhehtë që mund të ketë shkatuar këtë debat të fortë mes Gjiknurit edhe Ballës është edhe Këshilli Politik, ku ky i fundit ka filluar të fusë ‘hundët’ më shumë seç duhet.
Taulant Balla në emër të mazhorancës ftoi opozitën jashtëparlamentare që të dërgonte ose propozonte draft të ri për zgjedhjet, gjë kjo e cila mund të mos i ketë pëlqyer aspak Damianit, pasi ftesat, oferat dhe deklarata politike për Këshillin Politik dhe zgjedhjet ishin ekskluzivitet i tij.
Se për çfarë është zënë Balla me Gjiknurin mund të shkruajmë pa pushim dhe mund të aludojmë për gjithçka, duke nisur nga tenderat e miqve, tek emërimet në administratë apo dhe deri tek ndarja e pushtetit, por e sigurtë është vetëm një gjë, që si Damiani ashtu edhe Taulanti vetëm për hallet e shqiptarëve dhe socialistëve që ju kanë dhënë votën nuk janë zënë. /Taulant Halili /Boldnews.al
