Skuadra e Partizanit po përgatitet për një tjetër sezon të vështirë. Si të mos mjaftonte bllokimi i merkatos nga ana e FIFA-s, Partizanin tashmë e shqetëson edhe gjendja aspak e mirë e organikës së ekipit.
Reparti i mbrojtjes është më problematiku pasi Egzon Belica vijon të vuajë dëmtimin në pjesën e pasme të këmbës. Sakaq edhe Eneo Bitri është dëmtuar në vetull dhe ndaj Pogradecit u detyrua të luante i fashuar.
Me liqenorët pati probleme fizike për Malën, Cardoson dhe Melon, por që të tre nuk rrezikojnë dhe janë gati për të kontribuar në fushë.
Një tjetër lojtar që ka përfunduar në infermieri është Jasir Asani. Edhe pse për të u tha që do të transferohej në Turqi, deri më tani ai vijon të jetë në kryeqytet në fazë riaftësimi.
Mëngjërashi ka marrë një dëmtim në kavilje dhe po pret të rikuperohet për t’u vënë sërish nën urdhrat e trajnerit Ilir Daja.
