Partizani vazhdon me përgatitjet për fillimin e sezonit të ri. Shtyrja e startit të kampionatit ka bërë që Partizani t’u kthehet sërish përgatitjeve në Ohër, ku ka planifikuar edhe një miqësore, e cila do të luhet sot me Pogradecin në orën 16:45 në stadiumin “Gjorgji Kyçyku”.
Kjo minifazë e dytë i vjen në ndihmë trajnerit Daja, i cili ka më shumë kohë për të konfiguruar skuadrën. Partizani quhet kantier i hapur pune, pasi trajnerit Ilir Daja i duhet të zgjidhë pesë nyje në fazën defensive, ku në mungesë të prurjeve duhet të përshtatë lojtarë nga grupi i trashëguar nga sezoni i fundit.
