Policia italiane në bashkëpunim me autoritetet franceze kanë goditur një grup kriminal që vepronte në 4 shtete.
Sipas mediave italiane, policia ekzekutoi 46 urdhër arreste, ndërsa pasuria e sekuestruar arrin në vlerën e 900 mijë eurove.
Grupi kriminal vepronte midis Italisë, Francës, Belgjikës dhe Holandës në trafikun e kokainës, kanabisit, armëve, por edhe pastrimit të parave.
Agjencitë ligjzbatuese kanë arritur që të dokumentojnë shit-blerje droge, por edhe armësh mes të cilave të tipit Scorpion dhe kallashnikov.
Pjesë e bandës ishin edhe shqiptarët, të cilët po sipas medieve italiane, furnizonin grupin kriminal me sasi të mëdha kokainë për llogari të ‘Ndrangheta’-s.
