Ministrja e Arsimit, Besa Shahini, nëpërmjet një video-mesazhi ka uruar të gjithë nxënësit për nisjen e vitit të ri shkollor 2020-2021.
Shahini në këtë video-mesazh, shprehet se e kupton se do të jetë e vështirë respektimi i masave anti-covid për fëmijët, por kjo gjë është e domosdoshme.
“Nxënës të dashur! Nesër do të uleni në bankat e shkollës përsëri për të filluar vitin e ri shkollor 2020-2021. Kjo është një ditë e madhe dhe e rëndësishme për ju, ndaj jemi përkujdesur me stafet e shkollave, mësuesit tuaj, drejtorët e shkollave, si dhe të gjithë institucionet përgjegjëse për të siguruar një fillim sa më të mbarë për vitin e ri shkollor”, shprehet Shahini.
“E di që do e keni shumë të vështirë të ndiqni protokollet e sigurisë së shëndetit që kemi vendosur në shkollat tuaja, por kjo është e domosdoshme në mënyrë që të minimizojmë përhapjen e koronavirusit në shkollë, i cili është ende mes nesh, dhe në mënyrë që të qëndrojmë sa më gjatë në shkollë”, tha ministrja.
Shahini thotë se ministria ka një plan B, nëse mbyllet ndonjë klasë ose shkollë: “do të mbështetemi tek plani B, që është kanali “RTSH Shkollë”, ku i kemi të xhiruara të gjitha leksionet që do t’i zhvilloni edhe në shkollë me mësuesit tuaj, dhe kemi edhe platformën online që do të shërbejë për mësim në kushte shtëpie”.
