Liga Profesioniste e Futbollit është mbledhur sot teksa kanë marrë disa vendime të cilat mbështesin kërkesat e tyre ndaj qeverisë.
Katër kërkesat e tyre nuk janë plotësuar nga ana e qeverisë dhe kështu edhe javën e ardhshme nuk do të luhet futboll.
Ekipet pritet të zbresin në fushë dhe të përsërisin kërkesat që klubet e Superiores kanë. Ky është plani, që është publikuar edhe nga Liga.
Njoftimi:
Liga Profesioniste e Futbollit, vendim unanim i mbledhjes së datës 12 shtator 2020.
1) Klubet nuk do ta ndërpresin bojkotin e kampionatit dhe nuk do rikthehen më në fushat e blerta deri në përmbushjen e plotë të katër kërkesave të tyre. Në datën 19 shtator bojkoti do zhvillohet, pasi skuadrat të zbresin në fushë, të rreshtohen, të lexojnë kërkesat e Ligës dhe të solidarizohen me to. Nuk presim premtime nga qeveria, presim përmbushje të katër kërkesave tona minimale.
2) Mirëpresim vullnetin e shprehur të qeverisë për bisedime.
a – Këto bisedime duhet të jenë trepalëshe: Qeveri-FSHF-Ligë.
b – Grupi përfaqësues i Ligës në bisedimet me qeverinë përbëhet nga Koço Kokëdhima, Refik Halili dhe Gazment Demi.
Ne presim ftesën e qeverisë që këto bisedime të bëhen me të dhe në tryezat e saj.
c – Ne përshëndesim gatishmërinë, kontributin dhe përpjekjet e zotit Fidel Ylli për të përmirësuar kuadrin ligjor për sportet në Shqipëri dhe kemi besim se ai do mbetet i angazhuar për të mbështetur kërkesat tona. Për të biseduar me të Liga autorizon sekretarin e saj të përgjithshëm, Dritan Kadia.
3) Posterat e Ligës për bojkotin do bëhen publike nga dita e sotme.
4) U bëjmë thirrje komunitetit shqiptar të sporteve, shoqërisë civile dhe opinionit të gjerë shoqëror të bashkohen me kërkesat e Ligës dhe të mbështesin futbollin.
